بسم العظيم اللي بيده النوايب
اللي ليا عبده شكا الضيق زاحه
من عاش بالدنيا يشوف العجايب
ومن كف دمعه جاير الوقت ماحه
اريا العرب مابين مخطي وصايب
واخذت لي عن كل الاريا استراحه
ماجابوا لقوم السفينه مصايب
الا رجالٍ ما تعرف الملاحه
وخذتني اقدامي لبيض النصايب
وسويت لي لعيون اهلها مناحه
حتى تشرع خاطري للهبايب
ويومي طوى الليل وتنفس صباحه
ياناشدٍ عني ترى البال طايب
الما هماجه مختلط في قراحه
موجود لكني عن الناس غايب
احيان فالصده عن الناس راحه
الصدر ميدان وهمومي كتايب
خلت ضلوعي بالتنهت براحه
ياللي فدوك منقضات الذوايب
الحزن ماخلا بصدري مساحه
شيٍ بلا سبّه وشي بسبايب
وشيٍ يشيب رمش عيني ضحاحه
شف موق عيني ياعنى الروح رايب
الدمع زعزع هيبته واستباحه
والراس مما شافت العين شايب
الحزن غطاني بضافي جناحه
ياما خذينا بالرضى والغصايب
واللي يقفي جعل فاله مراحه
والحمد للي مد جوده صبابب
عشرٍ بدل وحده ترادف سحاحه
واللي تنشدني لك ايام غايب
احيان فالصده عن الناس راحه
