فدوى العتيبي

@ ما اسمك.؟ ـ فدوى محمد @ كيف المدرسة ..؟ ـ عادية وكأنها قربت @ واذا قريت وش فيها ..؟ ـ ما فيها شيء بس لا تخلص الإجازة @ بس الإجازة كانت طويلة ..؟ ـ عندك طويلة @ وعندك بعد..؟ ـ لا أنت ما تدرسين زينا عشان تحسين @ طيب المدرسة زينه والا لا..؟ ـ زينها تعلمنا وتخلينا نعرف نقرأ ونكتب @ عربي والا إنجليزي..؟ ـ انا ادرس العربي والانجليزي بس بنت عمي ما تدرس الا العربي @ ليش ..؟ ـ لان مديرتهم والابلات ما يعرفون يتكلمون الانجليزي @ انت وش رأيك بالسياسة..؟ ـ احلى شيء فيها اسمها @ طيب وش معنى السياسه..؟ ـ يعني تأخذين اللي تبينها من غير ضرب @ وكيف عرفت..؟ ـ ابوي يقولها دايم خذوا فدوى بالسياسة عشان تعطيكم اللي تبون @ عندك اسم دلع ..؟ ـ ايه.. يدلعوني باسم "فداوي .. تجرح وتداوي" @ تعرفين معنى اسم دلعك ..؟ ـ اعرف ان معناه حلو وبس @ هم يدلعونك عشان آخر العنقود يعني اصغر وحده..؟ ـ لا عشاني اكبر وحده @ طيب تســمحين لي اسويلك اختبار ..؟ ـ يوووه انا ناقصه مادريت انك زي الابله والا كان ماوافقت اسوي حوار معاك @ انا ابشوف كيفك بالانجليزي ..يمكن تسافرين امريكا والا لندن ؟ ـ طيب خلاص اسألي لا بارك الله في الانجليز واهلها @ تدرين خلاص ما اني بسألها شكلك زعلت..؟ ـ ما زعلت بس انت شكلك ما تعرفين الانجليزي اصلا @ الله يسامحك .. لكني ما راح اسألك..؟ ـ بكيفك..!! @ فدوى وين رحتي بالاجازة ..؟ ـ اماكن واجد زي المنتزهات والملاهي @ وش رأيك بمنتزهاتنا..؟ ـ مسكينه منتزهانتا ما تشبه "ديزني لاند" @ شلونك مع الكمبيوتر ..؟ ـ هذا صديقي اعرف له @ شلون تشتغلين فيه..؟ ـ اكتب به والعب به @ والانتر نت ..؟ ـ هذا أحلى واحلى @ طيب وش احلى موقع فيه..؟ ـ "عرائس باربي.." @ طيب كيفك مع المطبخ..؟ ـ آكل منه ورق العنب والمكرونة بالبشاميل اللي يسونها @ وانت تعرفين تسوينها..؟ ـ اعرف وش يحطون فيها بس توني على الطباخ.. @ اذا كبرت وش ودك تصيرين..؟ ـ ما ادري يمكن دكتورة ويمكن ابله ويمكن شيء ثاني يطلع جديد اذا كبرت واشغل به @ طيب وش آخر كلمة تقولينها ..؟ ـ أقول للبنات المدرسة جايه شدوا حيلكم والله معانا