للشمس طلعه يا سما لو هي تغيب
والشعـر له موعـد مع الصبح محلاه
يا صبح عمري رتب الحرف ترتيب
حتى يزين بعين منهو عشقناه
سلمان أمان الدار ستـر الرعابيب
سمح المحيـّا لا عدمنا محيّاه
أبو فهد وافي العهد راعي الطيب
طابت نفـوس الخلـق من طيب مرباه
هـو في جبين العـز نور وتراحيب
ماله مثيل ولا عرفنا له اشباه
بالمجد يرقى نايفات المراقيب
عالي وربي فوق الافلاك عـلا ّه
غنيت باسمه والصدى ردد مجيب
روحي فداه وكل الأرواح تفداه
عشقه يجول بشرقنا مايبي يغيب
ومن الجنوب ليا الشمال وتعدّاه
كل المحبه والغلا له معازيب
لا صار ضيف القلب مثله وشرواه
مايمشي إلا في رضا عالم الغيب
الله يصونه في صباحه وممساه
قلبه سحايب هو ملاذ المكاريب
والجود يكفي عـن بقايا سجاياه
له بالحكم حنكة وحكمة وأساليب
وله بالعدل ما يسعـد أرواح تنصاه
بينه وبين الشعـب ود ومواجيب
ظلٍ ظليل بعمره يظل من جاه
ضحكة حجاجه تبري الجرح ويطيب
حتى النظر بعيوننا لا لمحناه
عطفه ضماد اللي جروحه معاطيب
أفنى حياته في سبيل المداواه
ما خاب منهو به تعـزوى ولا تخيب
فيه الظنون وهذا من طيب مبداه
شال اليتامى في عيونه ولا ريب
لا من ذكرنا الخير حنـّـا ذكرناه
قاد البلاد لعاليات المراتيب
لين أصبحت عشق العرب يوم شفناه
يغرف لها مـن صافيات المشاريب
لعيونها ما يذخر الجهد والجاه
شامخ بذاته ما يهاب المصاعيب
للمجد والعليا سريعات ٍ خطاه
به من وصوف معكّفات المخاليب
حر ٍ ولد حر ٍ ولا به مراواه
انا اشهد انـه للمعادي لواهيب
يشهد له التاريخ وفعـول يمناه
صارم سياسي هو عطيب المضاريب
ما فيه ند ٍ ما يهابه ويخشاه
عالي بـروس مشمرخات الشخانيب
دون الوطن حصن ٍ حصين ٍ وجدناه
سيف ٍ شطيـر الحد مابه عذاريب
يثني الهوايل بأول العمر واتلاه
هذا المليك اللي نهج منهج الطيب
تاج الفخر عز العرب لا عدمناه