عطني للأفراح من وجنتك تأشيرة
ودي اسافر لها واحقق احلامي
وابني بقلبك من الإحساس لي ديرة
فيها من ابداع فكري يورق إلهامي
من غيرك اللي يهز القلب ويثيره
ياللي براحة يدك مستقبلي نامي
مثلك اذا خاف قلبي قلبك يجيره
من التعب والضجر بإحساسه السامي
يا نبضي المختلف بأجمل تعابيره
ودي أكمل بعينك أجمل أعوامي
لا غاب قلبك فجعني هاجس الحيرة
أهون عليّ من غيابه يوم، إعدامي
تدري وش أصعب دوا للقلب؟ تجبيره
لين انكسر من جفاك وزادت آلامي
(بين احتدام الأسى والشك والغيرة
نفسي تلاشت وضاعت زهرة أيامي)
عطني وعد لو بـ «طلة» وارفة، صغيرة
تسكّن الرجفة اللي اجتاحت اعظامي
لا تجيب طاري فراق وفضها سيرة
تأشيرتك هاتها باحقق أحلامي