هلابك

عامر عمار

لفت بنت المعزب كن ما قدامها رجال

الا يا ناشده رجال ويش اسمه وكم سنّه

عوايدها ليا مرت مضارب قومها تختال

انا بس وقفت لي وقفت الصفرا بعد عنّه

هلابك عد ما جاب الفرح والحزن من موال

هلابك كثر ما في الصدر من فرحه ومن ونّه

هلابك ليه ارحب بك وانا الطرقي وابي فنجال

من اول فوحتك يا دلة المضرم ويا بنّه

توسدت التعب مطوي على كور اتلعك بحبال

طويت اتلا مصاريب القرب عني بهالكنّه

قطعت اخر مسافات التعب في رحلة الجمال

قراهيد الروى لاماك وجمالي لهم حنه

حلى الطرقه نحر ليل وعلى يمة قمر وتلال

عليهن من بدور الوسم ما يقطع ضماهنّه

تهاتيه الحزوم الوان واقذال التلال اشكال

عليك التايه المنجوم وان ضيع يدلنّه

الي كم يوم عنك هناك لا مورد ولا مقيال

هنا لك بيت هو بيت القصيد لشاعرك غنّه

تعال الما يصك الجال والسايل عليه خيال

تعال اسمع معاويد ومرزيمن لهن خنّه

مداهيلك من الجمعه ليا الجمعه وهي شلال

ثمان ايام لو تنبت محاجرها غدت جنّه

عامر عمار يونيو 14, 2014, 6:05 ص