حزة الشدة

ضاوي العصيمي

يالله ياللي حزة الشدة بوجهك نستجير

في عفوك ورحمتك ما نفقد رجانا والامل

نطلبك في وقت الشدايد معك مانشرك خشير

ويقنع بما قدرت له عبدك لو مصابه جلل

يارب تسترنا بسترك واكفنا الشر الشرير

ياعالم ان العبد مهما كان عرضه للزلل

ويارب لا تجعل طلبنا عند ابو شبح قصير

والا ورى الهذار واللي صايب عقله خلل

بعض الاوادم لو يسوي فيك معروف صغير

قام يتبجح في المجالس لن ما عمره فعل

وبعض العرب يستصغر اللي يفعله لو هو كبير

يقول ما سويت شي وهو مزحزح له جبل

الاول احذر تطلعه بالسر لو وضعك خطير

يفضحك مدري هو يحس بنقص وإلا من جهل

والثاني المنصى لا زاد الحمل عن جهد البعير

اليا نخيته واعتزى يجعل لك الكايد سهل

يقوم ما يمرضك بالونوان والهرج الكثير

انا اشهد انه كفوا للكلمة ليا قالوا جمل

مقدر عند الرجال الطيبين وفيه خير

من طيب حظه صاير عند العرب مضرب مثل

خله رفيقك والسند وقت الشدايد والشوير

ترى الجنيه جنيه مهما صار ما يرجع هلل

ضاوي العصيمي يونيو 14, 2014, 6:05 ص