تغتابك الذاكرة ..!

تغتابك الذاكرة لا غبت واتذكرك وتتقاسمك نظرتين و راحتين و طعون ما نام جفن المريح الاّ وقمت اسهرك صار السهر نافذتْك وصرت كلّي عيون بعثرْك رعّاد شوقي والخيال امطرك وقامت تنامى زوايا غرفتي لك غصون وقمت فْـ سِلال الحنين آلّم بعض ثْمرك ولاّ على بعضك اللي باقي ازريت امون ! عايشت لحظة شتاتي يوم فَزّ اخضرك مدري وش اللي بقى مني فْـ حالة سكون هذا اولّك يا حبيبي وش يكون آخرك هذا اسهلك يا حبيبي أصعبك وش يكون يا قلّ غيرك بْـ عيني يوم شفت اكثرك يا قلّ غيري بْـ عينك لو تصير مْغبون رميت حِملك ولا ادري وين حِملك برك حيث انْ كلّي يا بعد اهلي لْـ حِملك متون من علّمك تجبر اللي لا نوى يصبرك ليلة ، يشوفك يصير الصبر عنّك جنون ارسلت لك شوق خفّاقي يجيب خْبرك كانت دموعي حمول و وجنتيني ظعون ليلين مرّوا وانا اتيقنْك واتحيّرك ليلين امّني بْشوفك أمنيات الجفون ومن قبل تلفي حكوا لي مسكك وعنبرك قلت اشعل اقصى الحنايا لـ اجل اشمّك دخون ما بين “ميّت عليك” و “حي بك” : مُعترَك يارب ما ينتهي لاْجلك صراع الشجون ! وش من خفوقي خذا ، وش في خفوقي ترك مقعادك البارحة ما بين صدرٍ ونون ما غيّر الوقت لا طبعك ولا مظهرك ما مثلك الاّ انت لو خان الزمن ما تخون