أنا مبطيٍ من هدة الطير يأبن حبيش
جنوبٍ من الفيحا شمال من الريشة
هداد اشقرٍ في سطوته عنفوان وطيش
مضارب كفوفه تودع الخرب في الهيشه
الى رف بالجنحان كنها صفوف الجيش
على قايد يامر وينهي على جيشه
منيف طويل العنق وافهق وجبر النيش
عريض الفخذ وقصير الساق والغيشه
وظافي شليلٍ كن خيوط الذهب شاليش
كما دقة البشت الحساوي وتنقيشه
ونابي صدر مدرج نحر كنه وادي بيش
وكن البرد في الصدر تقطر نشانيشه
عيونه حدادٍ واسعه شايش شويش
نبيهٍ إمقولم بوز نظراته اوحيشه
وصافي ظهر ماغبشه في الظهر تنميش
كن المرمر الصافي رشوشه وتنميشه
مندر حرارِ زاهيٍ كن لون الريش
شعاع الذهب والماس متمثني ريشه
عليه إبن عون إيتوق ومحمد ابن عفيش
وشاعر هوازن وابن جدلان في بيشه
أبهديه لو إنه عزيزٍ علي حتيش
على النايف الي كل عز مناويشه
محمد ولد نايف حزام الوطن لانيش
على أمن المواطن في مساه ومغابيشه
وريف العطا كم واحدٍ في ذراه إيعيش
وهو قبل مايلقاه مايهتني عيشه
عسى الله يحفظه سالمٍ غانمٍ ويعيش
عرين الأمن زيزوم اسوده وأشاويشه
وصوف النداوي شوشت بالفكر تشويش
وانا هاجسي يسهل على الحر تجييشه
أهوجس واقول العمر ماعاد فيه إلا إيش
مثل شايب عاده يتوق إلمطاريشه
وصلى الله وسلم على الهادي من اقريش
مااهل السحاب الي ترازم مراهيشه
